Dar es salaam. Jeshi la Polisi Kanda Maalum ya Dar es Salaam limefanikiwa kuwakamata na kuwashikilia Watu sita kwa tuhuma za kuwashambulia na kuwarekodi video za utupu Wapenzi wawili Mwanaume (Rashid Kawanje) na Mwanamke (Anitha Laurian) na baadae kuzituma kwenye mitandaoni ya Kijamii kwa lengo la kuwadhalilisha, huku wakidai kuwa wamewafumania.

Watuhumiwa hao ni Singiba Buchadi(42), Fundi umeme, Mkazi wa Kongowe mwisho,Dephina Buchadi (42), Mfanyabiashara, Mkazi wa Kongowe, Doratea Mathayo (39), Mkazi wa Kongowe Mwisho, Wilbard Teobard (55), Albert Buchadi (30), na Valenzi Silvester (40).

Kamanda wa Polisi kanda maalum ya Dar es salaam Jumanne Moliro amesema kuwa watuhumiwa wote hao watafikishwa mahakamani kukabiliana na tuhuma zinazowakabili.

“Vitendo vya kikatili walivyovifanya Watuhumiwa hao ni pamoja na kutoa adhabu wakati wao si Mahakimu au Majaji, vitendo hivyo havikubaliki kisheria katika Nchi inayofuata mfumo wa utawala wa sheria na kwa sababu hizo watafikishwa Mahakamani haraka iwezekanavyo” amesema Kamanda Muliro Jumanne , Kamanda wa Polisi Kanda Maalum ya Dar es salaam.