Dar es saalm. Kamati ya Maudhui ya Mamlaka ya Mawasiliano Tanzania (TCRA) imekisimamisha kwa muda Kipindi cha Shule ya Uongozi cha online TV kinachorushwa na mbunge wa kuteuliwa Humphrey Polepole.

Kamati hiyo imefafanua kwambaHumphrey Polepole Online Television ina mapungufu ya kutokuwa na wafanyakazi wenye taaluma ya uandishi na utangazaji wa habari, jambo linalowapelekea kukiuka sheria, kanuni, misingi na maadili ya uandishi na utangazaji wa habari katika kazi zao.

Aidha TCRA imetoa Onyo Kali kwa Kituo cha Humphrey Polepole Online Television na imemtaka mmiliki wa Kituo hicho kuhakikisha kituo hicho kinakuwa na wafanyakazi wenye taaluma ya uandishi wa habari na utangazaji ili kuleta ufanisi na tija Katika vipindi, pia Kituo hicho kimetakiwa kuhakikisha vipindi vyake vyote vinazingatia sheria, kanuni, misingi na maadili ya uandishi na utangazaji wa habari pamoja na masharti ya leseni yake na baada ya kufanyia kazi Maelekezo hayo Kituo hicho kinatakiwa kutoa taarifa kwa TCRA

Pia, TCRA imesema kuwa ikijiridhisha kuwa Maelekezo yaliyotolewa yametekelezwa Kipindi cha Shule ya Uongozi kitarejea na kitakuwa chini ya uangalizi wa TCRA kwa Kipindi cha miezi 6.