Mwenyekiti wa Kamati ya Bunge ya Haki, Maadili na Madaraka ya Bunge Emanuel Mwakasaka amesema amemuomba Spika wa Bunge wa Tanzania Job Ndugai kutoa kibali cha kukamatwa kwa Mbunge wa Ukonga, Jerry Silaa mara baada ya kukaidi wito wa kamati hiyo.

Jerry Silaa alipaswa kufika hii leo Agosti 26, 2021 saa 5 asubuhi mbele ya kamati hiyo kwa ajili ya shauri lake lililopaswa kuendelea, ila muda ambao shauri lilipaswa kuanza hakuwa amefika bungeni.

Kwa Mujibu wa maelezo ya mwenyekiti wa kamati hiyo Emanuel Mwakasaka aliyotoa siku ya kwanza ya mahojiano Mbunge huyo alipaswa kufika mbele ya kamati leo ili kuendelea na shauri lake.

Kutokana na hali hiyo Mwenyekiti Mwakasaka ameomba kibali kwa Spika wa Bunge cha kukamatwa na kufikishwa Mbele ya kamati kesho saa nne asubuhi Mbunge wa Ukonga Jerry Silaa kwa kile alichokieleza kuwa ni kudharau kamati na kutofika katika siku na muda aliotakiwa.

Pamoja na makosa yaliyofanya Mbunge huyo kuitwa mbele ya kamati ikiwamo kusema uongo na kushusha heshima na hadhi ya Bunge atakapofikishwa mbele ya kamati na Polisi pia atakabiliwa na kosa la kuidharau kamati hiyo.