Dar es salaam. Kamanda Mkuu wa Jeshi la Polisi nchini Tanzania, (IGP) Simon Sirro amewataka ndugu wa kijana Hamza Mohammed aliyeuwawa kwa majibizano ya risasi na Jeshi la polisi wakauchukue mwili huo kwakuwa wao kama Jeshi wameshamaliza kuufanyia kazi yao Juu ya mwili huo.

Hamza aliuwawa Agosti 25, 2021 kwa kupigwa risasi na polisi dakika chache baada ya kuwauwa askari polisi watatu na mlinzi mmoja wa kampuni binafsi karibu na ubalozi wa Ufaransa na daraja la Salenda jijini Dar es Salaam.

IGP Sirro ametoa kauli hiyo leo Jumamosi Agosti 28, 2021 wakati Jeshi la Polisi likiwaaga Makamishna wake, Balozi Valentino Mlowola na Robert Boaz amesema kuwa tayari wameshaufanyia kazi mwili huo hivyo ndugu zake wanaweza kwenda kuuchukua na wakishindwa mwili huo utazikwa na Halmashauri.

“Hiyo familia ya Hamza inajisikiaje, fikiria wewe ungekuwa baba yake Hamza, mama yake Hamza, mdogo wake ungejisikiaje kuzaa kwako umetuletea balaa Watanzania, kwahiyo naomba Watanzania wengine wasituzalie watoto kama Hamza” amesema Sirro