Rais Dk John Magufuli amempongeza Makamu wa Kwanza wa Rais wa Zanzibar, na Mwenyekiti wa chama cha ACT Wazalendo Maalim Seif Sharif Hamad kwa kuridhia kuingia katika Serikali ya Umoja wa Kitaifa ambapo anaamini kitaondoa uhasama wa vyama miongoni mwa wananchi wa Zanzibar.

Dk Magufuli ametoa Pongezi hizo hii leo Januari 14, 2021 wilayani Chato mkoani Geita kwenye ziara ya rais wa Zanzibar Dk Hussein Mwinyi mkoani humo ambapo ameambatana na Makamu wake wa Kwanza wa Rais, Maalim Seif Sharif Hamad.

“Kuna ndoa zilivunjika kule Pemba kutokana na itikadi ya vyama baada ya uchaguzi lakini baada ya Maalim Seif kuridhia kuingia katika Serikali ya Umoja wa Kitaifa zimerudi hivyo haya mambo ya vyama yasitusumbue sisi kama watanzania tunatakiwa kutanguliza maslahi ya nchi mbele” amesema Dk Magufuli

Aidha, Dk Magufuli amemtaka Dk Mwinyi kuendelea na kasi yake ya kutumbua majipu kwa wale wote wanaokwamisha maendeleo ya watu na kumtaka Maalim Seif kumsaidia katika hilo ili wale wote wanaofanya ubadhilifu katika mali za umma wapate kushughulikiwa.