Kilimanjaro. Jeshi la polisi mkoani Kilimanjaro linamshikilia mwanafunzi wa kidato cha nne (17) kwa tuhuma za kumbaka na kumpa ujauzito mwanafunzi mwenzake wa kidato cha tatu(16).

Kamanda wa polisi mkoa wa Kilimanjaro Simon Maigwa amesema tukio hilo limetokea Ushiri Ikwiini, Rombo.

Binti huyo aligundulika kuwa na ujauzito baada ya kufanyiwa vipimo katika Hospitali ya Huruma wilayani humo na kubainika kuwa na ujauzito wa miezi mitano na tayari mtuhumiwa amekamatwa .

Katika tukio jingine, mwananfunzi wa kidato cha nne Shule ya Sekondari Cyril Chami, Yasinta Mathew (17) amefariki dunia baada ya kujinyonga kwa kile kilichodaiwa kuwa na msongo wa mawazo.

Kamanda Maigwa amesema tukio hilo lilitokea Agosti 16, 2021 maeneo ya Mweka kata ya Kibosho Mashariki ambapo mwanafunzi huyo alijinyonga kwa vitenge viwili alivyovifunga juu ya paa la nyumba aliyokuwa akiishi .

Ameeleza kuwa katika uchunguzi wa awali inadaiwa kuwa chanzo cha tukio hilo ni msongo wa mawazo baada ya kusimamishwa masomo na kwamba mwili wa marehemu tayari umefanyiwa uchunguzi na daktari na kukabidhiwa kwa ndugu zake kwa taratibu za mazishi.