Morogoro. Mkuu wa Wilaya mpya wa Morogoro, Wakili Albert Msando na DC mwenzake wa Ulanga, Ngolo Malenya kwapamoja wamepata ajali ya gari mara baada ya gari walilokuwa wamepanda kugongwa uso kwa uso na gari ya Wizara ya Afya lililokuwa likitokea Mkoani Dodoma.

Kamanda Musilimu amesema gari walilokuwa wamepanda wakuu hao wa wilaya lilikuwa nyuma ya msafara na hivyo dereva alilazimika kuyapita magari yaliyokuwa yameruhusiwa na trafiki na ndipo gari hilo lilipogongwa.

“Wao walikuwa nyuma zaidi na gari lao liliachwa na msafara, askari aliyekuwa akisimamisha magari alipoona msafara umepita alianza kuyaruhusu magari mengine kuendelea na safari, ndipo dereva wa gari walilokuwa wamepanda viongozi hawa aliamua kuyapita magari mengine kwa lengo la kwenda kuungana na msafara, ghafla gari la wizara lilitokea kwa mbele na kugongana nalo uso kwa uso,” amesema Kamanda Musilimu.

Amesema wakuu hao wa wilaya walipelekwa katika hospitali ya Rufaa Mkoa wa Morogoro kwa matibabu.

Mganga Mkuu wa Mkoa, Kusirye Ukio amesema tayari wameshawapatia matibabu ya awali na utaratibu wa kuwahamishia Hospitali ya Taifa Muhimbili kwa matibabu na vipimo zaidi vya uchunguzi zinafanyika