Zanzibar: Bilionea wa Urusi, Igor Sosin (53) amefariki duniani katika chumba cha hoteli ya Park Hyatt, iliyopo Mji Mkongwe visiwani Zanzibar.

Kamanda wa Polisi wa Mkoa wa Mjini Magharibi, Awadh Juma Haji alithibitisha kutokea kwa kifo cha bilionea huyo kuwa kilitokea usiku wa Desemba 23.

Kamanda Awadh amesema siku hiyo, bilionea Sosin alikuwa na mwanamke aitwaye Arafa Ramadhan Mpondo (23), mkazi wa Fuonim Zanzibar ambaye anadaiwa kuwa ni mpenzi wake aliyempata kwa njia ya mtandao.

Sosin aliwasili visiwani Zanzibar Desemba 17 kwa ya ajili ya mapumziko ya mwisho wa mwaka na kufanya utalii, akiwa na mtoto wake aliyefahamika kwa jina la Taisia.

Alisema baada ya kuhojiwa Arafa alieleza kuwa saa 5:45 usiku alimuona marehemu hayuko vizuri lakini akaamua kulala naye hadi asubuhi.

Kulipokucha alimuamsha lakini hakuamka, ndipo alipotoa taarifa kwa uongozi wa hoteli kwa ajili ya hatua zaidi.

Kamanda alieleza kuwa mwili wa marehemu alipelekwa hospitali ya Mnazi Mmoja na majira ya saa 5:51 usiku kwa ajili ya kufanyiwa uchunguzi.