Dar es salaam. Makamu Mwenyekiti wa ACT Wazalendo Zanzibar Babu Juma Duni Haji amejiuzu nafasi yake kama Makamu Mwenyekiti wa chama hicho ili kuomba nafasi ya kumrithi aliyekuwa Mwenyekiti wa chama hicho taifa Marehemu Maalim Seif Sharif Hamad.

Jana Halmashauri Kuu ya ACT Wazalendo iliketi, katika kikao pamoja na mambo mengine lakini kimetoka na maazimio ya kutangaza rasmi uchaguzi wa nafasi za Mwenyekiti wa Chama Taifa, Makamu Mwenyekiti Zanzibar, na nafasi moja ya Mjumbe wa Halmashauri Kuu.

Kwenye barua yake ya kujiuzulu aliyomwandikia Katibu Mkuu wa Chama October 30, 2021, Ndugu Juma Duni Haji ameweka bayana kuwa amejiuzulu nafasi hiyo kwa sababu ana nia ya kugombea nafasi ya Mwenyekiti wa Chama Taifa, hivyo amejiuzulu ili nafasi hizo mbili zitangazwe pamoja.

Uchaguzi wa Mwenyekiti wa Chama, Makamu Mwenyekiti wa Zanzibar na uchaguzi wa nafasi moja ya Mjumbe wa Halmashauri Kuu Taifa ambayo nayo ipo wazi utafanyika kupitia Mkutano Mkuu wa Chama Taifa utakaofanyika January 29, 2022.