Babati. Jeshi la Polisi mkoani Manyara linawashikilia viongozi 2 wa Chama cha Mapinduzi CCM wilaya ya Babati kwa tuhuma za kumpiga kwa kumshambulia askari Polisi Fimbo na mateke sehemu mbalimbali za mwili, wakimtuhumu kuvamia mkutano wao.

Watuhumiwa hao ni Katibu wa CCM Wilaya ya Babati, Filbert Mdaki (52) na Katibu wa jumuiya ya vijana UVCCM wa wilaya hiyo, George Sanka (46).

Kwa mujibu wa Kamanda wa Polisi wa Mkoa wa Manyara, Benjamin Kuzaga alisema kuwa tukio hilo lilitokea kijiji cha Kirudiki wilayani Babati Desemba 16 saa 11 jioni.

Kamanda Kuzaga alisema watuhumiwa hao walimshambulia Koplo Baraka wa Kituo kidogo cha Polisi Kiru kwa kwa mateke na fimbo baada ya kufika kwenye mkusanyiko wa wananchi wa Kijiji cha Kirudiki.

“Askari huyo baada ya kuona mkusanyiko alifika ili aulizie juu ya kibali cha mkusanyiko huo, ndipo viongozi hao wakamshambulia maeneo mbalimbali ya mwili,” alisema kamanda Kuzaga