Mwanza. Taarifa kutoka Mwanza ni kwamba Zaidi ya watu 11 wamefariki Dunia papo hapo wakiwemo waandishi wa habari watano na wengine kadhaa kujeruhiwa leo Januari 11, 2022 baada ya magari waliokuwa wamepanda kugongana likiwemo gari la waandishi wa habari waliokuwa katika msafara wa Mkuu wa mkoa wa Mwanza katika barabara ya Sirari Mwanza.

Taarifa za awali kutoka mkoani Simiyu zinadai kuwa ajali hiyo imehusisha msafara wa mkuu wa mkoa wa Mwanza, Mhandisi Robert Gabriel ambaye alikuwa kwenye ziara ya kukabidhi miradi mbalimbali ya maendeleo.

Ajali hiyo imehusisha gari lilokuwa limebeba Waandishi wa Habari wa mwanza ambalo limegongana uso kwa uso na gari ndogo ya abiria aina ya Hiace ambapo waandishi wa habari watano wamefariki dunia papo hapo.

"Nimeongea na Mkuu wa Mkoa wa Mwanza, Mhandisi Robert Gabriel amethibitisha kutokea kwa taarifa za Watu watano waliokuwa kwenye gari hilo lililobeba Waandishi kufariki, majina ya wenzetu hao tutayatoa kadri tutakavyofuatilia"

"Kwa sasa Mkuu wa Mkoa nae anaelekea eneo la tukio nasi pia tunajipanga kwenda eneo la tukio, naomba tuwe watulivu kwa wakati huu, wakati team yetu na ya Mkuu wa Mkoa tunafuatilia tukio hilo" amesema Edwin Soko, Mwenyekiti, Mwanza Press Club