Dar es Salaam: Naibu Waziri wa Habari, Utamaduni, Sanaa na Michezo, Juliana Shonza amekataa kukubali utetezi wa Msanii wa Bongo Move Wema Sepetu kwamba kosa alilofanya linatokana na utoto ambapo kiuhalisia sio kweli.

Shonza amesema Wema anamiaka 30 sawa na yeye mwenye miaka 31, tatizo lake ameshindwa kujitambua kuwa yeye ni nani kwenye jamii.

“Wema hana utoto wowote, miaka 30 ukaseme mtoto, mie nina miaka 31 mbona sifanyi vitu kama hivyo na sijawahi kufanya,” amesema Shonza

Kufuatia hilo, amesema wizara kama mlezi wa wasanii itahakikisha inakemea vitendo hivyo na kuchukua hatua stahiki kwa wahusika wanaoitia doa tasnia ya sanaa.

“Bodi ya filamu imeshachukua hatua lakini bado mamlaka nyingine zitatekeleza majukumu yake katika hilo, asubiri adhabu ya (Mamlaka ya Udhibiti wa Mawasiliano Tanzania (TCRA) ,” amesema.

Hilo linaungwa mkono na Katibu Mtendaji wa Baraza la Sanaa Tanzania (Basata), Godfrey Mngereze ambaye amesema vitendo vichafu vya Wema vinajirudia mara kwa mara.

Msanii huyo juzi Alhamisi aliomba radhi kufuatia kusambaa kwa picha zake za faragha na Bodi ya Filamu Tanzania imemfungia kujihusisha na masuala ya filamu na uigizaji kwa muda usiojulikana.