England: Meneja wa klabu ya Manchester City Pep Guardiola amewaomba radhi mahasimu wao Manchester United kama sherehe za Manchester City baada ya ushindi ziliwakera.

Guardiola amesema wachezaji wana haki ya kusherehekea, hasa baada ya ushindi huo kuwafanya kuwa alama 11 mbele ya United.

"Ni lazima tufurahie haya. Iwapo watu hawaelewi, basi pole. Tulishinda debi," alisema.

"Iwapo hatukuwa sahihi, basi nawaomba radhi Manchester United. Nia yetu haikuwa hiyo. Nia yetu ilikuwa kusherehekea ndani ya chumba cha kubadilishia mavazi."

"Iwapo tuliwakera United - sio mchezaji mmoja, au Jose - Manchester United, basi naomba radhi," amesema Guardiola

Mourinho alirushiwa maziwa nje ya chumba cha kubadilishia mavazi baada yake kwenda kulalamikia jinsi City walivyokuwa wakisherehekea baada ya kushinda debi ya Manchester Jumapili iliyopita.

Mourinho na Guardiola walifanya kazi pamoja Barcelona, Mourinho akiwa msaidizi wa wakufunzi na Pep mchezaji, lakini uhusiano wao umedorora.

Alipoondoka Chelsea 2007, Mourinho anadaiwa kuhojiwa na wakuu wa Barcelona kuhusu kazi ya umeneja lakini badala yake Guardiola ambaye hakuwa na uzoefu mwingi kama yeye akapewa kazi hiyo Frank Rijkaard alipoondoka.