Wakili maarufu nchini Kenya mwenye utata Miguna Miguna, amedai kuwa mamlaka nchini Ujerumani imemzuia kupanda kwenye ndege ya kuja Kenya.

"Serekali ya Kenya imeitaka Lufthansa kutonisafirisha kwenye nchi yeyote Afrika... Meneja wa Usafirishaji amesema lazima serekali ifanye mawasiliano kwanza kabla ya mimi kuruhusiwa kusafiri kwenda Kenya" amesema Miguna Minguna

Bw. Miguna amesema kuwa tahadhari imetolewa kwamba asiondoke uwanja wa ndege wa Berlin kuelekea uwanja wa kimataifa wa JKIA au nchi yoyote ya Afrika.

Ndege ya shirika la Lufthansa aliyokuwa aabiri kuja Kenya ilikuwa imepangiwa kuondoka nchini Ujerumani saa tano na dakika ishirini na kuwasili Nairobi saa tatu na dakika ishirini na tano za usiku, majira ya Afrika mashariki.

Hatua hiyo inajiri saa kadhaa baada ya mahakama ya juu nchini Kenya kutoa agizo la kuitaka serikali ya Kenya kutomzuia wakili huyo aliyefurushwa kurejea nchini humo.

Serikali ya Kenya imesema kuwa itashughulikia suala hilo ili kumsaidia mwanasiasa huyo wa upinzani kurejea nchini siku ya Junanne, karibu miaka miwili baada ya kumfurusha kwenda Canada.

Wizara ya mambo ya ndani katika, taarifa yake imesema, itazingatia agizo la mahakama la mwaka 2018 ambalo liliagiza serikali impatie Bw. Miguna na stakabadhi za kumsaidia kurejea nchini humo.

Mahakama hiyo pia ili amuru maafisa wa kutetea haki za binadamu kuruhusiwa kuingia katika uwanja wa ndege kufuatilia mchakato huo.