Dar es salaam: Wafanyakazi wa Shirika la Umeme Tanzania (Tanesco) makao makuu Jijini Dar es salaam wameanza kuhamisha mizigo kuelekea ofisi nyingine ili kupisha ubomoaji wa jengo hilo lililopo kwenye hifadhi ya barabara.Uwongozi wa Shirika hilo umesema kuwa umeanza utekelezaji wa agizo la Rais Magufuli, kuhusu kubomolewa kwa jengo la ofisi zao za makao.

Taarifa iliyotolewa na Kitengo cha Uhusiano cha Tanesco, ilieleza kuwa kuanzia jana wameanza kuvunja ukuta wa mbele wa jengo lao, huku baadhi ya watumishi wakianza kuhamishiwa katika ofisi zao nyingine ili kupisha shughuli za ubomoaji kufanyika kwa usalama zaidi.
“Uongozi wa shirika pamoja na Wakala wa Majengo (TBA) wanaendelea kufanya taratibu zitakazowezesha zoezi la ubomoaji wa jengo kufanyika bila kuathiri huduma kwa wateja wa shirika.

“Katika kipindi hiki cha utekelezaji wa agizo la Mheshimiwa Rais. Tunapenda kuwahakikishia wateja wetu na Watanzania wote kwa ujumla kuwa huduma za umeme zitaendelea kupatikana kama kawaida ikiwamo huduma ya manunuzi ya Luku. Uongozi wa Shirika utaendelea kutoa taarifa kwa kadri zoezi hili linavyoendelea,” ilieleza taarifa hiyo