MONDULI: Wabunge wa Chama cha Mapinduzi(CCM) wakuwasha moto wa kampeni wakimnadi mgombea wa chama chao katika jimbo la Monduli Julius Karanga.

Wabunge hao wameendelea kuwavuta wananchi wa Jimbo kwa hoja zenye mashiko ili waweze kumchagua mgombea huyo ambapo walidai kuwa watahakikisha wanatatua changamoto zinazowakabili kwa kuwa awali Karanga alikuwa akibanwa kupeleka hoja za wananchi wake serikali kutokana na mfumo wa chama cha Demokrasia na Maendeleo(CHADEMA).

Kampeni hizo ziliongozwa na Mbunge wa Viti maalum Martha Mlata,Mbunge wa Kisarawe na Waziri wa Nchi Ofisi ya Rais, Tawala za Mikoa na Serikali za Mitaa(Tamisemi) Selemani Jafo,Mbunge wa Babati vijijini Jitu soni, Mbunge wa Mbulu Fratei Massey, na Mbunge wa Longido Dkt. Kiluswa.

Wabunge hao wamewaeleza wananchi kuwa serikali ndani ya muda mfupi imeshafanikisha fedha za ujenzi wa kituo cha afya Mto wa mbu na Makuyuni sambamba na miradi mbalimbali ya maendeleo.

Aidha wameahidi kuwa wataendelea kutekeleza mambo yaliyoahidiwa katika Ilani ya Uchaguzi ya chama hicho kwenye miradi ya barabara, elimu, maji, umeme, afya, na kushughulikia migogoro ya ardhi.