Ripoti ya New World Wealth pamoja na benki ya AfrAsia nchini Mauritius, inasema kuwa utajiri wa jiji la Dar es Salaam unathamani ya $25 bn hii ni kwa mwaka 2017 na kwa utajiri huo linashika nafasi ya 2 nyuma ya jiji la Nairobi kwa Afrika mashariki na linakuwa jiji la 12 barani Afrika wakati jiji la Nairobi linakuwa la 6.

Utajiri huo umetokana miongoni mwa mengine na viwango vya utajiri wa watu binafsi (HNWIs) na pia katika mapato yanayoingia katika sekta ya starehe barani Afrika kama hoteli na vivutio vingine.

Kwa jumla ripoti hiyo inakadiria kuwa sekta hiyo ya starehe barani Afrika imechangia takriban $ bilioni 6.0 za mapato mnamo 2017.

Kwa kuangazia kiwango cha ongezeko la utajiri, mataifa ya Jumuiya ya Afrika Mashariki, isipokuwa Burundi, ni miongoni mwa nchi ambazo zimeimarika pakubwa katika kipindi cha miaka kumi iliyopita.

Mauritius inaongoza kwa ukuaji wa asilimia 192 ikifuatwa na Ethiopia iliyokuwa kwa asilimia 190.

Baada ya hapo, mataifa ya Afrika Mashariki yanafuata yakiongozwa na Rwanda (74%), Kenya (73%), Tanzania (66%), na Uganda (53%).