Trump acharuka baada ya kuenea habari kuwa hana akili timamu, ajibu tuhuma

Rais Donald Trump wa Marekani ametoa radiamali kufuatia kuenea habari zinazotia shaka usalama wa akili yake.

Katika ujumbe aliouandika kwenye mtandao wa kijamii wa Twitter, Trump amewashambulia vikali wale wanaotia shaka usalama wake wa kiakili. Trump ameandika kuwa: baada ya mwaka mmoja wa kufanyika uchunguzi mpana na kuwabainikia wananchi wa Marekani kwamba suala la ushirikiano wa timu ya kampeni ya uchaguzi na serikali ya Russia ni uongo mtupu, Wademocrat na vyombo vya habari za kubuni wanaibua suala la yeye kutokuwa na akili timamu.

Kadhalika Rais Donald Trump amesema kwamba, hata Hillary Clinton ambaye alikuwa mshindani wake mwenye hila wa chama cha Democrat katika uchaguzi uliopita wa mwaka 2016, alitaka kutumia vibaya suala hilo dhidi yake na kwamba eti ameshindwa kufikia malengo. Suala la mienendo ya kushangaza ya Trump juu ya kutokuwa na uzima wa akili limepewa nafasi pia na magazeti ya Marekani. Katika uwanja huo Michael Wolff mwandishi wa Marekani amesambaza kitabu ambacho kinazungumzia miamala isiyo ya kiakili ya Rais Donald Trump wa nchi hiyo.