SINGIDA: Halmashauri Kuu ya Mkoa wa Singida imepokea Taarifa ya Utekelezaji wa Ilani ya Uchaguzi ya Chama Cha Mapinduzi (CCM) ya mwaka 2015-2020 kwa kipindi cha miaka miwili.

Akiwasilisha taarifa kwa niaba ya mkuu wa mkoa, mkuu wa wilaya ya Ikungi mheshimiwa Miraji Mtaturu amesema kwa kipindi cha miaka miwili mwaka 2016-2018 Ilani imetekelezwa vizuri kwenye sekta za Elimu, Afya, Maji, Miundombinu na Ulinzi na Usalama.

Amempongeza Rais mhe Dkt John Pombe Magufuli kwa maelekezo yake na kuleta fedha za miradi ya maendeleo iliyosababisha kutekeleza miradi yote ikiwemo vituo vya afya 10 vinavyoendelea kujengwa kwenye halmashauri zote za mkoa wa Singida kwa gharama ya shilingi bilioni 4.5.

"Tunamshukuru sana Rais wetu mh John Magufuli kwa kutuletea pia kiasi cha shilingi bilioni 3.7 kwa ajili ya mpango wa Elimu bure kwa shule za msingi na shilingi bilioni 3.1 kwa shule za Sekondari zilizosaidia sana kuongeza uandikishaji wa wanafunzi kwenye shule zote za Mkoa wa Singida,"alisema mkuu huyo.

Amewahakikishia kuwa serikali ya Awamu ya Tano imedhamiria kuongeza kasi ya kuwahudumia wananchi ili kuondoa kero zao na kuboresha maisha yao.