Mshambuliaji wa club ya Liverpool Mohamed Salah anachunguzwa na polisi nchini Uwingereza baada ya video yake kuibuka mitandaoni akionekana kuendesha gari huku akiwa bado anatumia simu.

Taarifa zinasema kuwa Klabu yake Liverpool inadaiwa kuwa ndiyo iliyopiga simu kwa polisi juu ya tukio hilo.

Polisi wa Merseyside wamethibitisha kupitia ujumbe wa Twitter kwamba video hiyo imekabidhiwa kitengo husika.

Msemaji wa Liverpool amesema waliwafahamisha polisi kuhusu video hiyo baada ya kuzungumza na mchezaji huyo.

Ameongeza kwamba hatua zozote zinazohitajia kuchukuliwa kuhusu tukio hilo zitachukuliwa kwa kufuata mifumo ya ndani.

Video hiyo ambayo imesambazwa sana kwenye Twitter inaonekana kumuonesha mchezaji huyo, akiwa anatumia simu yake akiwa amelisimamisha kwa muda huku akiwa amezingirwa na mashabiki, wakiwemo watoto. Kisha analingurumisha gari na kundoka akiwa bado anaitumia simu yake.

Raia huyo wa Misri aliwafungia Liverpool magoli 44 msimu uliopita.

Mo Salah alifunga bao Jumapili katika mechi ya kwanza ya Ligi Kuu England msimu huu ambapo aliwasaidia Liverpool kuwalaza West Ham 4-0.

Mabao hayo mengine yalifungwa na Sadio Mane (mawili) na Daniel Sturridge.