DODOMA: Kufuatia siku chache mtandao wa muakilishi kuripoti juu ya malalamiko ya wazee wa kata ya Hombolo Manispaa ya Dodoma kukatwa fedha zao za TASAF na kuingizwa katika mfuko wa Bima ya afya ya CHF Mkuu wa Mkoa wa Dodoma Jordan Rugimbana amekemea vikali suala hilo na kuiagiza halmashauri husika kuhakikisha wazee hao wanarudishiwa fedha zao haraka iwezekanavyo.

Mh Rugimbana ameyasema hayo wakati akizungumza na muakilishi leo ofisini kwake na kuongeza kuwa TASAF ni mfumo uliowekwa na Serikali kwa ajili ya kuwasaidia wazee masikini hivyo kuwakata fedha hizo kwa kisingizio cha kuwapatia kadi za Bima za CHF haikubaliki kwani wazee hao pia wanastahili kupatiwa matibabu bure.

Aidha kufuatia kitendo hicho Rugimbana ametoa siku saba kwa halmashauri ya manispaa ya Dodoma kuhakikisha inalifuatilia suala hilo na wazee wote wakiokatwa fedha zao ili hali wana sifa ya kupata matibabu bila malipo warudishiwe fedha zao.

Kwa upande wake mratibu wa TASAF Mkoa wa Dodoma Bogit Samhenda amesema si haki kwa wazee hao kukatwa fedha wanazopewa na TASAF kwa nguvu hivyo wananchi wanatakiwa kutoa taarifa za kiongozi atakayefanya kitendo hicho ili aweze kuchukuliwa hatua stahiki.