Taarifa za hivi punde kutoka Mkoani Geita zinaripoti kuwa Wanafunzi wapatao 6 wa shule ya msingi, Emaco Vision iliyopo mjini Geita wamefariki dunia baada ya kupigwa na radi wakiwa darasani huku wengine 25 wakijeruhiwa wakiwamo walimu wawili.

Tukio hilo limetokea leo Jumatano Oktoba 17, 2018 saa 3:30 asubuhi. Wakati mvua ikinyesha na radi kubwa kupiga.

Ofisa elimu msingi, Yese Kanyuma amethibitisha kutokea kwa vifo hivyo na kusema hadi sasa majeruhi ambao bado wako hospitali ni 25.

Awali, mwalimu mkuu wa shule hiyo, Octavia Laurian alisema madarasa yaliyopata kadhia ni ya darasa la kwanza hadi la tatu.

"Siwezi kusema kama kuna vifo maana sijathibitisha lakini waliokua na hali mbaya zaidi ni watatu na hawa 13 wana majeraha ya kawaida, wanafunzi wengi zaidi wamezimia" amesema Laurian.

Hadi sasa wazazi wapo kwenye viunga vya hospitali ya mkoa wakisubiri taarifa za watoto wao wanaopatiwa huduma kwenye kitengo cha dharura hospitalini hapo.