Mwanza: Jeshi la Polisi jijini Mwanza wameendelea kumshikilia binti wa miaka 20, Sonia Fanuel mkazi wa Nyegezi, Mwanza kwa tuhuma za WIZI baada ya kukutwa na funguo bandia 154. Kati ya funguo hizo, 53 zinadaiwa kuwa ni za vitasa na 101 ni za kufuli.

Akizungumza na waandishi wa habari jana sept. 14, Kamanda wa Polisi Mkoa wa Mwanza, Jonathan Shanna alisema msichana huyo alikamatwa juzi sept 13 saa 1:45 usiku katika Mtaa wa Rose, uliopo Nyegezi ambako anadaiwa kuwa alikuwa akifanya uhalifu.

Aidha Kamanda Shanna aliongezea kuwa Sonia alikamatwa baada ya wasichana wawili, Esther Isaack na Ruth Sumali, wakazi wa Mtaa wa Rose, Nyegezi, kukuta milango ya vyumba vyao imefunguliwa huku Sonia akiwa amejibanza ukutani.

Alisema walipokagua mali zao ndani, walibaini Sh160,000 zimeibwa na nguo zenye thamani ya Sh200,000. Kamanda huyo alisema mtuhumiwa atafikishwa mahakamani upelelezi ukikamilika.