Polisi Marekani wanawafanyia ujasusi Waislamu

Baraza la Mahusiano ya Kiislamu Marekani (CAIR) limesema polisi nchini Marekani wanawafanyia ujasusi Waislamu nchini humo.

Albert Cahn mkurugenzi wa masuala ya kisheria katika Baraza la Mahusiano ya Kiislamu Marekani amesema Polisi ya Marekani inawabagua na kuwashinikiza Waislamu wa nchi hiyo na hivyo kuwabugudhi katika maisha yao.

Cahn ameongeza kuwa, katika hali ambayo jinai na oparesheni nyingi za kigaidi nchini Marekani hutekelezwa na wazungu wabaguzi wa rangi wenye misimamo mikali, lakini baada ya Septemba 11 mwaka 2001, kumetekelezwa ubaguzi mkubwa dhidi ya Waislamu.

Cahn amesema, Waislamu wa Marekani, hasa katika mji wa New York, wanasailiwa na kusumbuliwa na polisi kwa kutekeleza ibada zao.

Hata kabla ya kuingia madarakani, Trump alikuwa akitumia maneno makali yaliyojaa chuki na kejeli dhidi ya Uislamu na Waislamu wakati wa kampeni zake za urais.

Siku chache baada ya kuingia madarakani, bilionea huyo alipasisha agizo la kupiga marufuku kuingia nchini Marekani raia na hata wakimbizi kutoka nchi za Waislamu.