Mbeya: Mwanafunzi wa Chuo Kikuu Mtakatifu Augustine (Saut) tawi la Mbeya, Moses Mashaka amefariki Dunia baada ya kujinyonga chumbani kwake kwa kutumia shuka yake ya kulalia jana baada ya kufungwa kwa club ya Liverpool 3 - 1 na Real Madrid usiku wa kuamkia jana.

Mwanafunzi huyo alikuwa anasoma mwaka wa pili, Kitivo cha Elimu na alikuwa akiishi eneo la Forest ya zamani jijini Mbeya karibu na chuo hicho.

Kwa mujibu wa Kamanda wa Polisi Mkoa wa Mbeya, Mussa Taibu amethibitisha kutokea kwa tukio hilo huku akibainisha taarifa za mwanafunzi kujinyonga walizipata kutoka kwa mama mwenye nyumba aliyempangisha chumba kijana huyo. “Kwa taarifa tunazosikia tu lakini hatuna ushahidi nazo ni kwamba kijana huyu jana ali 'beti' huku yeye akiipa nafasi ya ushindi timu yake ya Liverpool, hivyo baada ya kufungwa na yeye ndio amechukua uamuzi huo mgumu.” Amesema Kamanda Taibu.

“Lakini tunaendelea kuchunguza kiini zaidi cha kifo chake. Taarifa hizi sisi tumezipata kwa mama mwenye nyumba aliyekuwa amempangisha kijana huyo.”

Rais wa Serikali ya wanafunzi wa chuo hicho, Bahati Mahimbo amesema amezipata taarifa za kifo hicho jana mchana.

''Taarifa za mwanafunzi mwenzetu nimezipata Leo(jana) kutoka kwa rafiki zake wa karibu ambao walikuwa na ratiba ya kwenda kupata kipaimara katika Kanisa la Katoliki, Parokia ya Ruanda jijini hapa.” Amesema

Amesema rafiki zake walikubaliana kukutana kanisani kwa ajili ya kupata kipaimara pamoja lakini hadi muda wa kuanza ibada yeye alikuwa hajafika na walipomtafuta ndipo walipobaini taarifa za kujinyonga kwake