Dodoma: Taasisi ya Kuzui na Kupambana na Rushwa (Takukuru) imemkamata Mhadhiri mmoja wa Kitivo cha Sayansi ya Jamii, Chuo Kikuu cha Dodoma, Jacob Nyangusi kwa tuhuma za kumuomba rushwa ya ngono mwanafunzi wa mwaka wa kwanza ili amsaidie kwenye mitihani yake ya Marudio maarufu kama (SAP).

Akiongea na waandishi wa habari Jana Afisa mkuu wa TAKUKURU Sosthenes Kibwengo amesema kuwa Mhadhiri huyo alikamatwa saa tatu usiku katika eneo la nyumba mia tatu kata ya Nzuguni jijini Dodoma akiwa chumbani na mwanafunzi huyo baada ya Maafisa hao kuunda Mtego wa kumnasa Mhadhiri huyo.

Aidha Kibwengo amesema kuwa Kosa la Mhadhiri huyo wa UDOM ni kinyume na kifungu cha 25 cha Sheria ya Kuzuia na Kupambana na rushwa Na. 11/2007.

"Baadhi ya wahadhiri wasio waadilifu kuwataka wanachuo hasa wa kike kingono ili wawasaidie katika masomo yao. Aidha,baadhi wanawafelisha wanafunzi kwa makusudi na baadaye kuwataka rushwa ili warekebishe matokeo yao",Alisema Sosthenes Kibwengo