Nairobi: Makamu wa Rais wa Jamhuri ya Muungano wa Tanzania Mhe. Samia Suluhu Hassan leo tarehe 28 Novemba, 2017 amemtembelea Mbunge wa Singida Mashariki na Rais wa TLS Mhe. Tundu Lissu anayepata matibabu katika hospitali ya Nairobi nchini Kenya .

Mhe. Suluhu pia amemfikishia salamu za pole kutoka kwa Rais wa Jamhuri ya Muungano wa Tanzania Mhe. Dkt. John Pombe Magufuli ambaye amemtakia matibabu mema na kupona haraka ili arejee nyumbani na kuendelea na majukumu yake ya kila siku.

Mhe. Tundu Lissu amemshukuru Mhe. Rais Magufuli na Mhe. Samia Suluhu Hassan kwa kumjulia hali na amewatakia heri katika majukumu yao. “Msalimu Mhe. Rais mwambie namshukuru sana kwa salamu zake na kunijulia hali” amesema Mhe. Tundu Lissu.

Lissu anapatiwa matibabu katika hospitali ya Nairobi nchini kenya baada ya kushambuliwa kwa Risasi Septemba 7 mwaka huu nyumbani kwake Area D mjini Dodoma na kukimbizwa hospitali ya Dodoma kwa huduma za awali kabla ya kusafirishwa jioni kwenda mjini Nairobi kwa matibabu zaidi.

Mhe. Samia amewasili Mjini Nairobi nchini Kenya ambako alikuwa anamwakilisha Rais wa Jamhuri ya Muungano wa Tanzania Mhe. Dkt. John Pombe Magufuli katika sherehe za kuapishwa kwa Rais wa Jamhuri ya Kenya Mhe. Uhuru Kenyatta.

Katika uwanja wa ndege wa kimataifa wa Jomo Kenyatta Mhe. Samia Suluhu Hassan ambaye ameambatana na Naibu Waziri wa Mambo ya Nje na Ushirikiano wa Afrika Mashariki Dkt. Suzan Kolimba amepokelewa na Mhe. Balozi Robinson Njeru Githae wa Kenya na Balozi wa Tanzania nchini Kenya Mhe. Dkt. Pindi Chana.

Sherehe za kuapishwa kwa Mhe. Rais Uhuru Kenyatta zinafanyika katika uwanja wa Moi Kasarani Mjini Nairobi.