Bukoba: Waziri Mkuu Kassim Majaliwa amekiri kuwa CCM ilipata kura chache (kiduchu) katika Uchaguzi Mkuu wa 2015 huku akielekeza lawama zake kwa watumishi wa umma akisema walipanga kukiangusha chama hicho mwaka 2015, lakini hakikuanguka.

Aidha Majaliwa alisema kwa kuwa CCM haikuanguka, haitaanguka tena katika chaguzi zijazo.

Kauli ya Waziri Mkuu Majaliwa imekuja ikiwa ni siku chache tangu Katibu Mkuu wa CCM, Dk Bashiru Ally aliposema wapiga kura nchini wanaona uchaguzi ni sawa na vituko na maigizo, alipokuwa akizungumza katika kongamano la Mtandao wa Vikundi vya Wakulima (Mviwata) mkoani Morogoro.