Morogoro: Taasisi ya Kuzuia na Kupambana na Rushwa Tanzania (Takukuru) Mkoa wa Morogoro imewafikisha mahakamani ya Kilosa Ofisa Tarafa ya Kimamba, Ayubu Mvurungu na Ofisa Mtendaji wa Kata ya Rudewa, Thomas Mbwilo, kwa kosa la kupokea rushwa ya Sh milioni moja.

Kwa mujibu wa Taarifa ilitolewa na Kamanda wa Takukuru Mkoa wa Morogoro juzi, Janeth Machulya alisema watuhumiwa hao walifunguliwa kesi ya jinai namba 365/2018 mbele ya Hakimu Timoth Lyon na kusomewa shtaka la kupokea rushwa chini ya kifungu namba 15 (1) (a) cha Sheria ya Kuzuia na Kupambana na Rushwa namba 11 ya mwaka 2007.

Nae Mwendesha Mashtaka wa Takukuru, Sarah Martin, alidai mahakamani hapo kuwa Septemba 26, mwaka huu washtakiwa hao walipokea fedha hiyo ili waandae muhtasari utakaoonesha kwamba hati ya kimila namba 19 KLS/2238 ya umiliki wa shamba la mlalamikaji ilitolewa baada ya mkutano wa Halmashauri ya Kijiji cha Rudewa Mbuyuni kuridhia.

Washtakiwa hao walipokea fedha hizo huku wakijua wanachofanya ni kinyume na maadili yao ya kazi.

Hata hivyo, washtakiwa walikana mashtaka hayo na wapo nje kwa dhamana ya Sh milioni moja na kesi hiyo itatajwa tena Novemba 9, mwaka huu.