UKONGA DAR: Mjumbe wa Halmashauri Kuu ya CCM Taifa Mhe. Livingstone Lusinde(Kibajaji) pamoja na Waziri wa Nchi Ofisi ya Rais,Tawala za Mikoa na Serikali za Mitaa(TAMISEMI) Selemani Jafo wametikisa kwenye kampeni za kumnadi Mgombea wa Jimbo la Ukonga kupitia CCM Mwita Waitara kwa kutoa hoja mbalimbali ambazo zimesababisha wanachama kadhaa wa vyama vya Chadema na CUF kuhamia CCM.

Wapambanaji hao wa walilindima katika maeneo ya Magole na Mbombambili ndani ya Jimbo la Ukonga wakiwahutubia mamia ya watu waliohudhuria mikutano hiyo.

Ajenda kuu zilizotawala mikutano hiyo ni kushughulikia matatizo ya wananchi hususan suala la mipaka, barabara, ujenzi wa hospitali ya Kivule pamoja na Umeme.

Kwa upande wake, Mgombea ubunge wa Jimbo hilo Waitara amewataka wananchi hao kumpigia kura siku ya Jumapili ya tarehe 16/09/2018 kwa kuwa kwasasa yupo katika chama sahihi cha kushughulikia matatizo yao yanayowakabili.

Amesema awali alipokuwa Chadema alizuiwa hata kuongea na Mawaziri pamoja na kulazimishwa kuikataa bajeti wakati wa vipindi vya Bunge kitendo kilichosababisha kurudisha nyuma maendeleo ya wananchi wa Jimbo hilo.