Dar es salaam: Kamanda wa Polisi Kanda Maalumu ya Dar es Salaam, Lazaro Mambosasa amesema jumla ya watu 26 mpaka sasa wamekamatwa na wanaendelea kwa mahojiano kufuatia tukio la utekwaji wa mfanyabiashara maarufu Mohammed Dewji ‘Mo’

Akizungumza na muakilishi mchana wa leo Jumapili Oktoba 14, 2018 amesema, “nakumbuka Hadi jana jioni walikuwa wamefika jumla ya watuhumiwa 26, lakini sina idadi ya leo" alisema Mambosasa.

Miongoni mwa 26 waliokamatwa ni msemaji wa klabu ya Simba, Haji Manara na kwa mujibu wa Mambosasa, hatua hiyo ni sehemu ya kazi ya uchunguzi na baada ya kukamilisha kuwahoji atatoa taarifa.

Kuhusu idadi ya walioachiwa huru na majina yao, Mambosasa amekataa kutoa taarifa hiyo akidai inaweza kuathiri sehemu ya uchunguzi.

MO ambaye ni mwekezaji katika klabu ya Simba akiwa na hisa 49, alitekwa alfajiri Oktoba 11, 2018 katika Hostel ya Colosseum, Oysterbay jijini Dar es Salaam alipokwenda kwa lengo la kufanya mazoezi.