Maafisa wa jimbo la California nchini Marekani wametangaza kuwa, kutokana na serikali kuu kutochukua hatua za kuudhibiti moto uliozuka kwenye misitu ya jimbo hilo, idadi ya watu walioaga dunia hadi sasa kutokana na moto huo imefikia 59.

Maafisa wa jimbo la California wamesema, wakati moto huo unaendelea kuwaka katika misitu ya jimbo hilo kwa siku ya saba sasa, watu wasiopungua 59 wameshapoteza maisha na wengine zaidi ya 130 hawajulikani waliko.

Sehemu kubwa ya moto huo, unaojulikana kama Camp Fire na ambao unaendelea kuwaka katika sehemu tatu za jimbo la California kwa wakati mmoja, imelikumba eneo la kaskazini ya jimbo hilo.

Kwa mujibu wa maafisa wa jimbo la California, Camp Fire hadi sasa umeshateketeza hekta 137,000 za misitu ya kaskazini mwa jimbo hilo pamoja na nyumba karibu 9,000.