Dar es salaam: Katibu Mkuu wa Chama Cha Mapinduzi (CCM), Dk. Bashiru Ally, amesema hatua ya Bilionea Mohammed Dewji maarufu "Mo" kupatikana baada ya kutekwa na watu wasiojulikana kitendo hicho kilitia dowa kubwa kama taifa lakini akasema kupatikana kwake wiki iliyopita kumewaumbua waropokaji ambao ni maadui wa nchi.

Akizungumza jana Octoba 26 jijini Dar es Salaama baada ya kuwasili nchini akitokea China alikokuwa na ziara ya siku 10 ya kujifunza masuala mbalimbali ya maendeleo na utawala huku akiwa ameambatana na baadhi ya wajumbe wa Halmashauri Kuu ya CCM, Dk. Bashiru, alisema kupatikana kwa Mo baada ya kutelekezwa eneo la Viwanja vya Gymkhana, kumewaumbua maadui wa ndani waliokuwa wameanza kuitumia nafasi ya kupotea kwake kuichafua nchi.

Alisema maadui hao wa ndani walitumia nafasi ya kupotea kwa Dewji kuiingiza nchi katika mgogoro wa kiuchumi ili wawekezaji wapoteze imani ya kuja kuwekeza hapa nchini.

“Ningependa kushukuru vyombo vya ulinzi na usalama na niwapongeze Watanzania kwa ndugu yetu Dewji kupatikana maana mimi niliacha kizaa zaa hapa lakini nilipokuwa China nikapewa habari kwamba amepatikana.

“Hili lilikuwa ni doa kubwa, kulikuwa na maadui wa ndani walishaanza kuitumia hiyo nafasi kutuchafua na kutuingiza katika mgogoro wa kiuchumi ili wawekezaji wapoteze imani, kwa hiyo wale walioanza kuropoka wameumbuka na mimi nilipokuwa naondoka nilisema masuala ya ulinzi na usalama ni nyeti katika dunia ya sasa, tuyajadili kwa umakini,” alisema

Mo alitekwa alhamisi ya tarehe 11 Octoba mwaka huu katika Hoteli ya Colosseum, Oysterbay jijini Dar es Salaam mahali alikokuwa anakwenda kwa ajili ya kufanya mazoezi ya mwili (gym).