Dar es salaam: Label kubwa ya Music nchini Tanzania WCB Wasafi imesitisha mahusiano ya kikazi na aliyekuwa meneja wa Harmonize Bw. Joel Vincent ambaye anajulikana kwa jina maarufu kama Mr. Puaz baada ya kukosekana kwa maelewano na msanii huyo hivi karibuni.

Mr Puaz amesema kuwa Mwanamuziki Harmonize amekuwa akimdharau na kupuuza ushauri wake.

''Niliketi chini na Diamond Platinumz na kumuelezea yaliojiri na tukakubaliana kwamba sitaendelea kusimamia tena muziki wa Harmonize''. alisema Mr Puaz wakati Akizungumza na shirika la habari la BBC

Ameongezea kwamba msanii huyo amejawa na ''kiburi'' tangu aanze kupata mafanikio ya kimuziki .

''Naelewa kwamba ni kijana mdogo ambaye ametoka katika familia masikini, lakini utajiri na umaarufu aliopata kutokana na mafanikio ya muziki wake umeathiri tabia yake''.

''Inawezekana kwamba huenda pia mimi nina mapungufu yangu lakini yote haya ilikuwa kujaribu kumuuza yeye katika muziki'', aliongezea Mr. Puaz.

Meneja huyo alisema kuwa mara ya mwisho kushirikiana na msanii huyo ni wakati wa Tamasha la Wasafi lililofanyika mjini Diani nchini Kenya tarehe nane mwezi Disemba mwaa uliopita.

''Baada ya tamasha hilo nilirudi Tanzania na kumuelezea Diamond kwamba mimi siwezi tena kufanya kazi na Harmonize na kiongozi huyo wa WCB akaheshimu uamuzi wangu'', alisema.