London: Mchezaji wa zamani wa Liverpool Jamie Carragher amebashiri kuwa Kocha wa klabu ya Chelsea Antonio Conte ataondoka Chelsea mwishoni mwa msimu ujao, Conte ameshinda taji la ligi kuu msimu wa 2016/2017 wa Uingereza, lakini msimu huu wa majira ya joto haujaenda sawa na mipango yake kwa sababu Kumekosekana utulivu ndani ya Chelsea kutokana na mamlaka ya klabu hiyo kutompa uhuru kocha wao kufanya kile anachopenda.

Msimu huu Chelsea wamemsajili Antonio Rudiger, Tiemoue Bakayoko na Alvaro Morata, lakini walimkosa Romelu Lukaku aliyejiunga na Manchester United na Danilo aliyetua Manchester City.

Kulikuwa na mfarakano mapema msimu huu wa majira ya joto na Conte alikuwa akifikiria kuacha kazi, lakini aliishia kusaini mkataba mpya wa miaka miwili mwezi Julai.

Inaonekana wazi wazi kuwa meneja huyo amekerwa na hali ya klabu, na Carrgher anaamini kuwa uongozi wa Chelsea unaweza kumfanya Conte aondoke.

"Nitashangaa kama itapita miezi 12 akiwa bado meneja wa Chelsea," beki huyo mstaafu alikiambia Sky Sport.

"Nadhani ni meneja asiyependa kuingiliwa na watu wenye mamlaka, hasa baada ya kutwaa taji. Hawezi kukaa kimya na haitakuwa vema kwa klabu ikiwa meneja atazungumza kama alivyo yeye."

Kwa wachezaji walioondoka, Chelse imepoteza wachezaji wengi, ikiwa ni pamoja na Nemanja Matic, Nathan Ake na John Terry.