Zanzibar: Kiongozi Mkuu wa chama cha ACT- Wazalendo, Zitto zuberi Kabwe leo Machi 21, 2019 amewasili visiwani Zanzibar na kulakiwa na mamia ya wanachama wa chama hicho akiwamo mwanachama mpya Aliyekuwa katibu mkuu wa chama cha CUF Maalim Seif Sharif Hamad.

Zitto amefika asubuhi saa 4 katika ofisi mpya za ACT- Wazalendo zilizopo Vuga, Unguja ambazo hapo awali zilikuwa makao makuu ya Chama cha Wananchi (CUF) visiwani humo.

Maalim Seif alimpokea Zitto huku mamia ya wana ACT- Wazalendo wakimpokea kwa nyimbo mbalimbali. Zitto na Maalim walivalishwa mataji kisha wakaenda kukaa eneo maalum lililoandaliwa. Alipopewa fursa ya kusalimia, Zitto amesema, “Nina furaha sana leo, nataka kuwahakikishia tumeshashusha tanga, tumeshapandisha tanga, safari inaendelea.” Maalim Seif amewasalimia wafuasi wa chama hicho akisema: “ACTWazalendo”.

Ilipofika saa 4.52 asubuhi, Zitto ambaye pia ni mbunge wa Kigoma Mjini na Maalim Seif aliyewahi kuwa katibu mkuu wa CUF pamoja na baadhi ya viongozi waliingia ndani huku nyimbo zikiendelea kutumbuiza na wanachama wakicheza.

Maalim Seif Shariff Hamad, yeye aliwasili visiwani Zanzibar jana akitokea dar akiwa mwanachama wa Chama cha ACT-Wazalendo.

Seif alilakiwa na mamia ya wafuasi wa ACT-Wazalendo waliokusanyika katika ofisi hizo kwa namna ya pekee huku wakimrushia mchele ambapo wenyeji wanasema tafsiri yake ni kumuepusha na husda na jicho baya.

Maalim Seif anatarajiwa kuzungumza na wanachama hao mjini Unguja ikiwa ni mara ya kwanza tangu ahame kutoka CUF.