DODOMA: SERIKALI imesema kuwa ,itawahamishia watumishi wote waliokuwa wa Mamlaka ya ustawishaji makao makuu (CDA) katika Manispaa ya Dodoma lakini itafanya mchujo kwa watumishi ambao walikuwa wanalalamikiwa na wananchi na kuwaweka pembeni ili kupata timu mpya ambayo itafanya kazi vizuri.

Kauli hiyo imetolewa leo Bungeni Mjini Dodoma na Waziri Mkuu wa Jamhuri ya Muungano wa Tanzania,KASSIM MAJALIWA wakati akijibu swali la Mbunge wa Viti Maalum,MARTHA MLATA katika kipindi cha Maswali ya papo kwa hapo kwa Waziri Mkuu.

Katika swali lake,MLATA alitaka kujua tamko la Serikali kuhusu baadhi ya wananchi ambao walilipia viwanja kwa iliyokuwa Mamlaka ya ustawishaji Makao Makuu(CDA) lakini hawakukabidhiwa viwanja vyao.

Akijibu swali hilo,MAJALIWA amesema kuwa hivi sasa wanaendelea na uhakiki wa masuala ya fedha kujua CDAiliachwa na fedha kiasi gani na shughuli zake zilifikia hatua gani ili waweze kuendelea lakini shughuli zote zitatolewa na Manispaa hiyo ya Dodoma baada ya zoezi hilo kupita.

Hata hivyo amebainisha kuwa hivi sasa katika Ofisi ya Manispaa itakuwa inatoa hati badala ya kwenda katika ofisi nyingine.