Wawili kati ya watu 124 waliosafirishwa kwa ndege ya Ujerumani kutoka mji wa China wa Wuhan ambao ni kitovu cha homa itokanayo na virusi vya Corona, wamekutwa na maambukizi ya virusi hivyo.

Shirika la Msalaba Mwekundu lililoitoa taarifa hiyo, limesema watu hao hivi sasa wamewekwa chini ya karantini katika hospitali ya mjini Frankfurt. Watu hao walithibitishwa kuwa na maambukizi wakati wa vipimo vilivyochukuliwa katika kambi ya jeshi ya Germasheim, ambako watu waliotoka Wuhan wamepewa hifadhi.

Hivi sasa idadi ya visa vya maambukizi ya virusi vya Corona nchini Ujerumani imefika watu 10. Waziri wa afya wa Ujerumani Jens Spahn amesema amezungumza kwa njia ya simu na mwenzake wa Marekani, na wamekubaliana juu ya haja ya mawaziri wa jumuiya ya nchi saba zilizoendelea kiviwanda, G7 kukutana kupanga mkakati wa pamoja dhidi ya homa hiyo hatari.