Viongozi wa waandamanaji nchini Sudan wamekataa wito wa mazungumzo uliotolewa na watawala wa kijeshi, wakitaka haki ipatikane dhidi ya wanajeshi waliohusika na mauaji ya raia zaidi ya 100 wiki hii.

Wito wa jeshi unakuja ikiwa siku nne zimepita tangu litangaze kusitisha mazungumzo na waandamanaji pamoja na kufuta makubaliano yote yaliyokuwa yamefikiwa katika mazungumzo ya awali.

Jumatatu ya wiki hii, vyombo vya usalama nchini humo vilitumia nguvu kubwa kuwaondoa maelfu ya raia waliokuwa wamepiga kambi nje ya makao makuu ya jeshi, ambapo watu zaidi ya 100 wameuawa na wengine mamia kujeruhiwa.

Wapiganaji wa waasi kutoka kundi la Janjaweed wanatuhumiwa kuhusika katika utekelezaji wa vitendo vya unyanyasaji wa raia ikiwemo kuwatesa, kuwaua na kuwabaka wanawake kadhaa.

Msemaji wa Baraza la wasomi ambalo linaongoza maandamano hayo, Amjad Farid amesema wananchi hawako tayari kwa mazungumzo na wanajeshi kwa kile alichosema hawaamini huku akitaka kwanza waliohusika na mauaji pamoja na unyanyasaji wa raia wakamatwe.

Hali hiyo imeendelea kusababisha kutanda kwa hali ya wasiwasi nchini humo, wakati huu jeshi likiwa limetangaza kuwa Uchaguzi nchini humo utafanyika baada ya miezi tisa, lakini waandamanaji wamekataa hilo.

Mataifa ya Magharibi yakiongozwa na Marekani yamelaani hatua ya uongozi wa kijeshi kuamua kutumia nguvu dhidi ya waandamanaji.