Rais wa Marekanio Donald Trump amebainisha kwamba anatahmini uwezekano wa kuzuia kufanya mawasiliano yake na Makamu wake Mike Pence ambaye alionekana akithibitisha kwamba yuko karantini baada ya msaidizi wake kupatikana na virusi vya Corona.

Alipoulizwa katika mkutano na waandishi wa habari kuhusu hatua za kupunguza mawasiliano yao kwa kujilinda na maambukizi ya virusi vya Corona, rais wa Marekani amejibu: "Hili ni jambo ambalo labda tutazungumzia katika kipindi hiki cha kizuizini".

Mike Pence, ambaye anaongoza kikosi kazi cha rais Trump kinachopambana na maambukizi ya virusi vya corona, hakuwepo kwenye mkutano huo na waandishi wa habari.

Wakati huo huo wataalamu wa juu wa masuala ya afya wa utawala wa rais Donald Trump wa Marekani wanaohusika na janga la virusi vya corona watatoa ushahidi katika Baraza la Seneti kwa njia ya vidio wiki hii baada ya watatu kati yao pamoja na mwenyekiti wa kamati kukaribiana na mtu aliyeambukizwa maradhi ya COVID-19.

Hayo yanajiri wakati idadi ya vifo vinavyotokana na janga la Corona imefikia zaidi ya 80,000 nchini Marekani, kulingana na takwimu za shirika la habari la Reuters.