Misungwi: Mkazi wa kijiji cha Mwanzamiso wilayani misungwi mkoani Mwanza, Jacob Shabani (30) amefikishwa katika Mahakama ya wilaya ya Misungwi, kwa tuhuma ya kuishi na mwanae kinyumba na kuzaa naye watoto wawili.

Akisoma hati ya mashataka mbele ya Hakimu Mkazi Mfawidhi wa Mahakama ya wilaya ya Misungwi Erick Marley, Mwendesha Mashtaka wa Serekali Ramsoney Saleh alidai kuwa mshitakiwa alimuweka kinyumba mwanaye huyo mwenye umri wa miaka 17 na kumzalisha watoto wawili na kwamba alikuwa akiishi nae chumba kimoja.

Mwendesha mashtaka huyo aliendelea kudai kuwa, kwa sasa amebaki mtoto mmoja mwenye umri wa mwaka mmoja na mwingine aliyekuwa na umri wa miaka mitatu alifariki dunia. “Mtuhumiwa alibainika anaishi na mwanaye wa kike chumba kimoja na kulala nae kitanda kimoja na alikamatwa baada ya wananchi kutoa taarifa kuhusu tukio hilo,” alidai Salehe.

Hata hivyo, mshtakiwa huyo alikana makosa hayo. Upande wa mashtaka ulieleza kuwa upelelezi umekamilika. Hakimu Marley aliahirisha shauri hilo hadi Aprili 23 kesi hiyo itakapoanza kusikilizwa na mtuhumiwa alirudishwa rumande baada ya kukosa mdhamini.