Dodoma: Makamo wa Rais wa Tanzania,Bi Samia Suluhu Hassan ameshangazwa na watu wanaohoji kuhusu ulinzi alionao kwa sasa Rais wa Tanzania John Magufuli huku akisema wanaofanya hivyo wameishiwa na kufilisika vya kuzungumza.

Kauli hiyo ya Bi Samia ameitoa leo Jumamosi Aprili 13, 2019 wakati wa hafla ya uzinduzi wa mji wa kiserikali uliopo Ihumwe mkoani Dodoma uliofanywa na Rais Magufuli.

Samia anasema “Nilisikiliza dondoo za magazeti na kusikia mtu anahoji kuhusu ulinzi wa rais, nikajiuliza anahoji ulinzi ili iweje kwa nini asitumie muda huo kuhoji maendeleo yanayoendelea.”

“Hii inaashiria kwamba jamaa zetu wameishiwa, wamefilisika na mawazo na nini wazungumze ndani ya nchi yetu, kwa sababu hawawezi kuzungumzia maendeleo haya watakuwa wanajitia kisu cha tumbo kwa hiyo sasa wanajiweka katika kuhoji vitu ambavyo havihitaji kuhojiwa, ila Watanzania tuko na wewe,” amesema.

Samia ametoa kauli hiyo ikiwa ni siku moja imepita tangu Kiongozi wa Kambi Rasmi ya Upinzani Bungeni, Freeman Mbowe jana jioni akichangia mjadala wa bajeti ya ofisi ya Rais, Tamisemi na Utumishi wa Umma na Utawala Bora kuhoji ulinzi wa rais kuwa mkubwa.