Saud Arabia: Rubani mmoja wa ndege nchini Saud Arabia amelazimika kuigeuza ndege angani na kuirudisha ndege hiyo uwanja wa ndege baada ya abiria mmoja kumsahau mtoto wake uwanja wa ndege wa kimataifa wa King Abdulaziz uliopo Jeddah nchini humo.

Vyombo vya habari nchini humo vimeripoti kuwa ndege hiyo ya Saudia SV832 ilirudi baada ya abiria huyo kutoa taarifa kwa wahudumu wa ndege hiyo kuwa amesahau mtoto wake sehemu ya mapumziko ya uwanja wa ndege na kwamba hayupo tayari kuendelea na safari hiyo.

Ndege hiyo iliyokuwa imetoka Jeddah kwenda Kuala Lumpur ilibidi igeuze ikiwa tayari angani baada ya mazungumzo ya rubani na maofisa wa kuongoza ndege waliokuwa uwanja wa ndege wa Jeddah.

“Mola awe nasi, tunaomba kurejea uwanja wa ndege,” inasikika sauti ya rubani ikiomba kurejea na kuwaacha maofisa wa kuongoza ndege waliokuwa uwanjani wakishangaa na kushauriana.

Mmoja wa waongoza ndege anasikika akiomba ushauri kwa wenzake huku akisema, “kuna abiria kasahau mtoto wake hapa, maskini!” Rubani anasikika akisisitiza tena, “nimekwambia kuna abiria kasahau mtoto wake hapo uwanjani na hataki kuendelea na safari, nataka kurudisha ndege.”