Dar es Salaam. Rais John Magufuli amesema utendaji wake wa kazi kipindi cha uwongozi wa Rais Mstaaafu awamu ya tatu Benjameni Mkapa ulisababisha mpaka kunyweshwa sumu na ilibaki kidogo apoteze maisha kabisa mpaka alipochukua hatua ya kwenda kuomba kujiuzulu Uwaziri.

Magufuli ametoa kauli hiyo leo Jumanne Novemba 12, 2019 katika uzinduzi wa kitabu cha Rais mstaafu Benjamin Mkapa cha Maisha Yangu, Kusudio Langu.

“Nakumbuka mzee Mkapa pale tulipofanya kazi vizuri alipata furaha hasa katika ujenzi wa barabara na baadaye akatamka kuwa mimi (Magufuli) ni askari wa mwamvuli namba moja.”

“Siwezi kusahau suala hilo maisha mwangu kwa kuwa liliniletea matatizo nilianza kuona dalili za baadhi ya mawaziri tena wengine wa ngazi za juu kuanza kunichukia,” amesema Magufuli.

Amebainisha kuwa baadaye alinyweshwa sumu, “nilinyweshwa sumu Dodoma almanusura iondoe uhai wangu lakini kwa neema za Mungu nikakiepuka kifo.”

“Baada ya kunusurika na kifo nilimfuata mzee Mkapa kumweleza dhamira yangu ya kutaka kujiuzulu. Nakumbuka siku hiyo aliniangalia jicho la baba na mwana akanihurumia, alinipa ujasiri akaniambia John kafanye kazi kamtangulize Mungu.”