Aliyekuwa rais wa Sudan Omar al-Bashir amekiri mahakamani kuwa alipokea mamilioni ya dola za kimarekani kutoka familia ya kifalme ya Saudi Arabia kwa njia zisizo halali. Akikutwa na hatia anaweza kufungwa miaka 10 jela.

Mahakama nchini Sudan imemfungulia rais wa zamani wa nchi hiyo Omar al-Bashir mashtaka rasmi ya rushwa na kupokea fedha kutoka nje ya nchi kwa njia zilizo kinyume na sheria.

Akizungumza katika kikao cha tatu cha mahakama inayosikiliza kesi ya Bashiri, Jaji Al-Sadiq Abdelrahman amesema fedha za kigeni za mataifa mbali mbali zilikutwa nyumbani kwa Omar al-Bashir baada ya utawala wake kuangushwa. Amesema maafisa wa utawala walikamata euro milioni 6.9, dola za kimarekani zaidi ya laki 3.5 na pauni za Sudan milioni 5.7 zote katika pesa taslimu zilizopatikana kwa njia zisizo halali.

Mamilioni yaliyosafirishwa kwa ndege binafsi

Alipoulizwa alikozipata fedha hizo, Bashiri amekiri kuwa alizipokea kutoka kwa watu walio katika familia ya kifalme ya Saudi Arabia.

''Meneja wa ofisi yangu alipokea simu kutoka ofisi ya Mrithi wa Ufalme wa Saudi Arabia Mohammed bin Salman, ambapo aliarifiwa kuwa walikuwa wametuma ujumbe ambao ungewasili Sudan kwa ndege binafsi.'' Bashir ameiambia mahakama wakati wa kusikilizwa kesi dhidi yake, na kuongeza kuwa mrithi huyo wa Ufalme wa Saudi Arabia hakutaka jina lake lionekane katika nyaraka za kuzipokea fedha hizo.

Awali, mwendesha mashtaka alikuwa ameiambia mahakama kwamba Bashir alipokea dola milioni 90 kutoka familia ya kifalme ya Saudi Arabia. Shirika la habari la AFP limeripoti kuwa kesi dhidi ya kiongozi huyo wa zamanai wa Sudan imeahirishwa hadi tarehe 7 mwezi ujao wa Septemba.

Omar al-Bashir aliondolewa madarakani Aprili mwaka huu baada ya maandamano makubwa ya umma dhidi ya utawala wake wa miongo mitatu. Bashiri anatafutwa pia na Mahakama ya Kimataifa ya Uhalifu, ICC yenye makao yake mjini the Hague, kwa tuhuma za kuhusika katika mauaji ya halaiki katika jimbo la Darfur Magharibi mwa Sudan.