Jeshi la Polisi mkoani Kagera linamshikilia kijana mmoja jina Alfred Kamugisha ambaye ni mkazi wa Kijiji cha Kishaanda, Kata Kibale wilayani Kyerwa kwa tuhuma za mauaji ya Afisa wa Mamlaka ya Hifadhi za Taifa (TANAPA) na kufanya vitendo vya ujangili.

Alfred anatuhumiwa kumuua Matondo Masunga Januari 6 mwaka huu kwa kumchoma na mkuki wenye sumu wakati akifanya shughuli za ujangili katika Hifadhi ya Rumanyika.

Akizungumzia tukio hilo Mkuu wa Wilaya ya Kyerwa, Rashidi Mwaimu mbali na kutuma salamu za rambirambi amesema kuwa mwaka 2019 mtuhumiwa huyo alikamatwa kwa tuhuma mbalimbali ikiwemo mauaji, lakini alitoroka na pingu akiwa chini ya ulinzi.

Aidha, amewataka wananchi kuendelea kutoa taarifa zitakazofanikisha kutiwa hatiani kwa watu wanaofanya uhalifu na kwamba hawatamvumilia mtu yeyote anayehatarisha wanyama ambao ni urithi wa nchi.