Kamanda wa Polisi Kinondoni, Mussa Taibu amethibitisha kuwa Jeshi la Polisi linamshikilia mwandishi wa habari Erick Kabendera kwa mahojiano, na kwamba ataachiliwa mahojiano yakikamilika. Kabendera alichukuliaa na watu waliojitambulisha ni Polisi, lakini hawakuonesha vitambulisho.

Awali Mkuu wa Polisi Kanda Maalum ya Dar es Salaam, Lazaro Mambosasa alipoulizwa alisema kuwa hana taarifa zozote za tukio hilo, lakini wanafuatilia kupata ukweli kwani ndio kazi yao, na kisha watatoa ufafanuzi hapo baadaye.

Erick Kabendera ambaye ni mwandishi wa habari za kiuchunguzi alichukuliwa kwa nguvu na watu wapatao 6 waliojitambulisha kuwa ni maafisa wa jeshi la polisi nyumbani kwake, Mbweni, Dar es Salaam jioni ya jana Jumatato Julai 29, 2019. Watu hao walimchukua na kusema wanampeleka Kituo cha Polisi Oysterbay, huku wakichukua simu yake na ya mke wake.

Hapo awali taarifa zinasema, kabla ya hapo, simu zake zote zilifungwa; na alipopiga simu Vodacom aliambiwa kuwa hayo ndio maelekezo waliyopewa na Mamlaka ya Mawasiliano ya taifa (TCRA).