Morogoro. Jeshi la Polisi mkoani Morogoro limedhitisha kuwa linamshikilia mtu mmoja ambaye jina lake halijafahamika mara baada ya kukutwa mtoni na mtoto mwenye umri kati ya miaka 8 hadi 10, wote wakiwa hawana nguo huku akiwa na panga na msumeno, huku akimzamisha mtoto huyo kwenye maji.

Tukio hilo limetokea jana Alhamisi Desemba 19, 2019 katika maporomoko ya maji ya Nguzo Camp mkoani humo, video zake kuanza kusambaa leo asubuhi katika mitandao mbalimbali ya kijamii, zikimuonyesha akiwa na mtoto kwenye maji na watu wakifanya jitihada za kuwaokoa.

Kamanda wa Polisi Mkoa wa Morogoro, Wilbroad Mutafungwa amesema nikweli wanamshikilia mtu huyo lakini atalitolea maelezo ya kina leo Jumamosi Desemba 21, 2019 katika mkutano na waandishi wa habari.

Mashuda wanaeleza kuwa wakati mtu huyo akiwa katika maporomoko ya maji kwenye mto huo, askari waliokuwa katika shughuli nyingine walimuona na kumtilia shaka

“Walipomuona alijitosa kwenye maji ya kina kirefu akiwa na mtoto aliyekuwa akipiga kelele akisema ‘baba unaniua, baba unaniua’,” zinaeleza taarifa hizo.

“Walifanikiwa kumtoa katika maji akiwa na mtoto huyo na anashikiliwa na polisi. Mtoto naye yupo salama.”