Shinyanga: Maisha yamekuwa tofauti kwa mtanzania Joseph Temba ambae ni mchimbaji mdogo wa madini wa mkoani Shinyanga baada ya kuwa Tajiri ghafla kwa kuuza almasi yake kwa takriban dola za kimarekani milioni moja nukta nne($1.4m) sawa na Shilingi Bilioni 3.

Inataarifiwa kuwa Almasi hiyo yenye karati 512 ilipatikana na mchimbaji madini huyo wiki mbili zilizopita katika eneo la Maganzo huko mkoani Shinyanga.

Bwana Temba ameishukuru Wizara ya Madini na Tume ya Madini kwa muongozo na usimamizi wa Almasi yake na muongozo wa utaratibu wa mauzo ambao uko wazi.

Kulingana na naibu waziri wa madini nchini humo Stanlaus Nyongo almasi hiyo ndio kubwa zaidi kuwahi kupatikana nchini humo.

Naibu Waziri Nyongo alishuhudia uuzwaji wa almasi hiyo na kusema kuwa Serikali yapata Milioni 238 kutokana na mauzo hayo.

Nyongo amewahimiza na kuwasisitizia wachimbaji wote na wanunuzi kote nchini kufanya shughuli hizo kwenye masoko ya madini yaliyoainishwa na kutambulika na Serikali.