Mlinzi wa Spika wa bunge la kaunti ya Meru Joseph Kaberia ameuawa kwa kupigwa risasi jijini Nairobi nchini Kenya.

Vyombo vya habari nchini Kenya vimeripoti kuwa mlinzi huyo alipigwa risasi jana Jumapili, Julai 21, katika eneo la Kamiti Corner.

Kwamujibu wa polisi, nchini humo wanasema mlinzi huyo alikuwa pamoja na dereva wa Spika wakati ambapo kisa hicho kinatokea.

Tayari, derevea huyo amekamatwa ili kusaidia maafisa wa polisi na uchunguzi zaidi kuhusiana na kisa hicho huku polisi wakishuku pia huenda alihusika kwa njia fulani.

Kulingana na polisi, wawili hao walipatikana katika eneo la mkasa baada ya wakazi kuwaita polisi waliposkia milio ya risasi mida ya saa tisa usiku.

Mkuu wa polisi jijini Nairobi Philip Ndolo alisema wawili hao walikuwa wamejihami kwa bunduki huku dereva akiwa ametumia risasi 20 za bastola yake naye mlinzi hakuwa ametumia hata risasi moja.

Ndolo alisema baada ya polisi kufika katika eneo la mkasa, waliwapata wawili hao huku mlinzi akiwa amepigwa risasi kifuani na dereva kwenye mguu wake.

“Walikimbizwa hospitalini na mlinzi huyo kufariki akipokea matibabu,” Ndolo alisema.

Baadhi ya majirani walisema waliamshwa na mabishano kati ya wawili hao kabla ya kuskia milio ya risasi.

Ndolo alisema uchunguzi zaidi utafanyiwa bunduki ya dereva huyo ili kubaini iwapo ndio ilitumika kummaliza mwenzake.